بحبكم قوى قوى

مارو
حبيبه قلبى و صاحبتى و بنتى اللى بحبها و بخاف عليها و مقدرش استغنى عنها ابدا
انا الوحيده اللى مسموح لها انها تبهدلك و تشتتمك و اضربك كمان لو حبيت ... اعمل كل اللى انا عايزاه فيكى ..
طبعا عشان غالبا بيبقي عندى حق (H) و بعمل ده بكل حب (L)(A)
بس لو حد تانى قرب لك .. بيبقي عندى استعداد اولع لك فيه ...
من 5 سنين و انتى ثابته فى حياتى وانا ثابته فى حياتك .. مهما حصل بيننا مش بنحتاج اكتر من كلمه عشان ننسي كل حاجه
واكن مفيش حاجه حصلت
بحبك قوى قوى و بخاف عليكى قوى قوى ... و نفسي تعقلى وربنا يهديكى ..
واحضر فرحك و اطمن عليكي
بموت فيكى يا بت


سلطان "نجم بحري"
الكاتب و الروائى و السيناريست و بتاع ميكروسوفت بالبدله الكحليه احيانا ...
يمكن انا اتعرفت عليك من اقل من سنه .. بس من اول مرتين اتكلمنا فيهم و انت بقيت من اقرب الناس ليا ...
مع انى عاده مش باخد على الناس بسرعه كده ..
بس انت بجد حد جميل قوى .. وطيب قوى قوى ..
اكتر حد فى الدنيا بحس انه خايف عليا .. و عايز يشوفنى احسن واحده فى الدنيا ..
واكتر واحد برده بطلع عليه عصبيتى و جنانى و بقفش عليه ... و بيستحملنى و بيبقي زعلان عليا مش منى ..
لو تبطل بس التريقه و التعليقات اللى تعصب بتاعتك .. هتبقي حد محصلش ...
بس نقول ايه بقي ... الحكايه دى عنك فى الدم .. صعب تبطلها ..
بس انا بجد مديونه لك بحاجات كتير ... و انت عملت لى حاجات كتيييييييييييير قوى
حتى لو انت مش واخد بالك منها
ربنا يخليك ليا يا رب .. عشان انا بحبك قوى و مقدرش استغنى عنك ..



احمد "برنس امبابه "
حبيبي ... حبيبي و رجالى ....
يمكن برده اتعرفنا من اقل من سنه ... اتخانقنا كتير و ولعنا فى بعض .. كتير برده ..
بس عدينا كل ده عشان كنا حاسين اننا ممكن نبقي اصحاب كويسين ...
بس بجد بجد مهما كنت غالى و مهم عندى قبل كده .. فكل ده اتضاعف مليون مره اليومين دول ..
عشان انا شفت احمد تانى غير العصبي المتقلب ابو خلق ضيق ...
انا اه كنت عارفه ان ورا كل ده فى حد نضيف من جوه ..
بس اللى شفته كان احسن ما كنت فاكراه ...
انت جدع قوى .. و طيب قوى قوى .. و حنين لاقصى درجه ..
وانا بحبك قوى
وبجد مش ممكن انسي وقفتك جنبي ابدا
ربنا يسعدك


امجد
صديقى الطويل المؤثر .. بحب فيك تاثيرك يا امجد :P
بس انت صديق طويل بقلب طفل ... و لو تبطل تقول كلام انت مش قده و متقدرش تعمله هتبقي جامد اخر حاجه ...
بس ازاى لازم تفتكر نفسك تقدر و انا افكرك و اقول لك متقدرش ..
بس انا بحبك بغلاوبايتك ايوه اللى هى مصدر "غلاباوي" ... وانك انت اللى سوسه مش انا (A) ...
بس ربنا يخليك ليا يارب و افرح بيك مع بنت الحلال اللى اكيد هتبقي قصيره ..
عشان مفيش الاطوال بتاعتك دى فى البنات :D


شايما
حبيبتى .. المفروض اننا نعرف بعض من سنين .. بس علاقتنا كانت سطحيه و كلامنا مش كتير ..
لحد ما جيتى مصر و اتعرفنا على بعض بجد ... و بقينا بنتكلم لدرجه ان شركه التليفونات هيبعتلنا جوابات شكر ..
بس بحس انى مسئوله عنك .. يمكن الاحساس ده بحسه ناحيه مارو و احمد كمان ...
بس انتى بحس انى مسئوله عنك فعلا .. ساعات بحس انى بخنقك من خوفى عليكى ... بس بجد نفسي اطمن عليكى ..
ويمكن عشان كده مش بحكيلك و انا متضايقه عشان انتى مش ناقصه ..
والمفروض انا اللى اساعدك مش ازود عليكي ....
بس بجد يا بت انتى انا بحبك قوى يا شجره يا سمكه يا قطه ..


امانى
اختى المجنونه .. المشغوله ...
انا بحبك قوى يا بت و وحشانى قوى قوى ... بس عارفه مشغوليات حضرتك كتير
كان الله فى العون
بس برده مهما قعدنا كتير منتكلمش ..
ده مش ممكن يبعدنا عن بعض ... او يغير فى علاقتنا ..
عشان انتى اختى و صاحبتى ..
اللى مستغناش عنها ابدا



انتوا كلكم بجد اغلى ناس عندى فى الدنيا ...
و مقدرش استغنى عن اى واحده او واحد فيكم ...
عشان انتوا اللى ليا فى الدنيا دى ..
وكلكوا بحس اننا مش بس اصحاب ..
بس انتوا اخواتى و عيلتى ...
اللى لو الناس بتختار اهلها بنفسها ... كنت اخترتكم انتم ..
واللى معاكوا بحس انى ممكن اعمل اى حاجه ...
اتجنن .. اتهبل .. اتعصب .. اعيط و انهار ..
مش بتكسف منكم ... عشان بحبكم و عارفه انكم بتحبونى
و بتموتوا فيا طبعا (A) (H)
ومهما عملت او شفتوا منى ... برده هتفضلوا تحبونى
ومتقدروش تستغنوا عنى ابدا
زى ما انا مش ممكن استغنى عنكم

وانا بحبكم كلكم ... و بحب عيوبكم قبل مميزاتكم
ومش بعرف ابقي مبسوطه او مستريحه لو حد فيكم تعبان و متضايق
و ببقي مبسوطه جدا جدا لما بتبقوا مبسوطين
او اما ببقى عارفه انكم متاكدين .. ان لو حد فيكم احتاج اى حاجه فى اى وقت
انه لازم يجيلي وان انا حتى لو مكنش فى ايدى اساعده .. فهفهمكم و احس بيكوا واحاول اعمل كل اللى اقدر عليه

ربنا يخليكوا ليا
وميحرمنيش منكوا
وميحرمكوش منى (A)(H)