مـــن هــى نــــــــــور ؟

من هى نور؟

هى بنت بسيطه اوى .. و معقده جدا

هى بتحب اللى حواليها اوى ... و بتحاول تدى كل اللى عندها
اللى تقدر عليه و اللى متقدرش

هى مش عارفه تكره حد .. و بيقتلها احساس ان حد بيكرهها
وجودها مع حد بيكرهها .. بيسحب روحها و بيسحب الهوا اللى بتتنفسه
عشان هى عمرها ما قصدت تأذى حد
ومع ذلك برده الناس بتكرهها

هى مش قويه .. و فى نفس الوقت مش ضعيفه
بس هشه .. هشه اوى
مش قويه ..عشان كل حاجه بتأثر فيها و تنهار و تقع
ومش ضعيفه .. عشان بترجع بعدها تقف تانى على رجلها

هى كائن عجيب .. نزل منه نسخه واحده
وده من رحمه ربنا بعباده

بتخبى ضعفها ورا لسانها الطويل و اسلوبها المستفذ
ناس بتشوف انها متستحقش حد يستحمل اسلوبها ده
وناس بتشوف ان محدش يقدر يتحمله

بس هى شايفه ان لو حد عرفها صح .. هيقدر يتحمل
وانها تستحق ان الناس تتقبلها زى ما هى

ولو ان لحد دلوقتى محدش قدر يعمل ده
حتى اهلها !!

هى مش بتعرف تتعامل مع الناس باسلوبهم
مش بتعرف تحمى نفسها و تهتم بيها
بتشوف عيوبها قبل مميزاتها
يمكن الناس تشوف ده قله ثقه بالنفس و ضعف
بس هى بتشوفه واقعيه

هى بتحاول تعمل الصح حتى لو كان غلط فى عيون الناس
مش بتعرف تحط نفسها الاول .. تحط احتياجتها هى الاول
مش بتعرف تبقي انانيه مع حد .. حتى اما بيكون انانى معاها
بس لازم تعمل ده !

هى مجنونه و دماغها ضاربه ... حساسه بغباء
بتفضل تخزن جواها و تسكت لحد ما تنفجر و فى لحظه تدمر كل حاجه
و تضيع كل حاجه كويسه عملتها قبل كده

هى كائن غير اجتماعى بالمره .. يعانى صعوبه فى التعامل مع البشر
حد بيتعامل بتلقائيه .. و بيعمل تصرفات لو فكر فيها عمره ما كان عملها
حد بيغلط كتير ... بس اما بيغلط بيعتذر
ومعندوش مشكله فى اعترافه بالحقيقه ..
عشان هى مش صغيره عشان الكدب يكبرها و يعليها


هى حد دماغه جايباه ورا .. مش بتبطل تفكير فى كل حاجه
حد شايل فوق طاقته ... حد مشيل نفسه فوق طاقته
شايل همه و هموم اللى بيحبهم معاه
مع انه اضعف من انه يشيل نفسه

هى تعبانه اوى ... بجد تعبانه اوى
لدرجه محدش ممكن يتصورها
مش قادره تتكلم مع حد .,. مش قادره تعمل حاجه
نفسها تسيب الدنيا ... لو الموضوع باختيارنا كانت سابتها
بس مش بايدنا عشان روحنا مش ملكنا
بس عايزه تبعد عن الدنيا و الناس

هى حاسه ان محدش راحمها ... ولا هى راحمه نفسها
وبتعيش دلوقتى اضعف حالاتها
اعصابها محروقه .. رجلها مش شايلاها .. جسمها نفسه من كتر
الضغط النفسي اللى فيه مبقاش متحمل ... و بقي بيقع ...
ومحتاجه وقت طويل اوى عشان تقدر تقف على رجلها
عشان محدش ممكن يرحمها و هى مش راحمه نفسها
محدش هيخاف عليها و هى مش خايفه على نفسها

هى جواها حاجات كتير لناس كتير
لو اتقالت هتجرح .. فبتسكت عشان مش قادره تجرح حد


هى بتقول للكل اسفه على اى حاجه وحشه طلعت منها فى حق حد
وياريت تسامحوها... وتدعولها ...
بس هى مش قادره تعرف حد دلوقتى



بجد محتاجه اجازه من نفسي
وبعدها اجازه مع نفسي
عشان مينفعش اى حاجه تبوظ اكتر من دلوقتى
عشان انا جوايا حاجات كتير اوى بايظه و محتاجه تصليح