يا باب يا مقفول ... إمتي الدخول صبرت ياما و اللي يصبر ينول دقيت سنين ... و الرد يرجع لي : مين ؟ لو كنت عارف مين أنا كنت أقول عجبي !!!
أنا شاب لكن عمري ألف عام وحيد لكن بين ضلوعي زحام خايف و لكن خوفي مني أنا أخرس و لكن قلبي مليان كلام عجبي !!!!
يا حزين يا قمقم تحت بحر الضياع حزين أنا زيك و إيه مستطاع الحزن ما بقالهوش جلال يا جدع الحزن زي البرد ... زي الصداع عجبي !!!!
كيف شفت قلبي و النبي يا طبيــــــــــــب همد و مات و الا سامع له دبيـــــــــــــب قاللي لقيته مختنق بالدمـــــــــــــــــــــوع و ما لوش دوا غير لمسه من إيد حبيب عجبي !!!!
عيني رأت مولود علي كتف أمـــــــــــه يصرخ تهنن فيه يصرخ تضــــــــــــمه يصرخ تقول يا بني ما تنطق كـــــــلام ده اللي ما يتكلمش يكتر همـــــــــــــه عجبي !!!!
No comments:
Post a Comment